*ವಿಪರ್ಯಾಸ*

ಅಂದ? ಚೆಂದ?
ಅಂದ-ಚೆಂದ ಬರಿ ಚರ್ಮದಾಳಕ್ಕೆ!
ಬಾಹ್ಯ ಸೌಂದರ್ಯ ಬರಿ ಕಣ್ಣಿನಾಳಕ್ಕೆ!
ಅಂದಿದ್ದರು ಅವರೆಲ್ಲರೂ ಹಲವು ಬಾರಿ
ನಾ ನಕ್ಕಿದ್ದೆ.
ಪ್ರತಿ ಬಾರಿಯೂ ನಾ ಸುಮ್ಮನೆ ನಕ್ಕಿದ್ದೆ!
ನಗುವಿನಿಂದಿನ ವ್ಯಂಗ್ಯ ಅವರಿಗೆ ತಿಳಿವುದಾದರೂ ಹೇಗೆ?
ಹ್ಞಾ! ವ್ಯಂಗ್ಯ ನಗುವಲ್ಲದೆ ಮತ್ತೇನು?
ನಿಯತಕಾಲಿಕೆಗಳಲಿ ಬರುವ
ರೂಪದರ್ಶಿಕೆಯರ ಅಂದ-ಚೆಂದ
ಮೈಮಾಟಕ್ಕೆ ಮನಸೋತು
ಗಂಟೆಗಟ್ಟಲೆ ಮನದಲ್ಲೇ
ಜೊಲ್ಲುಸುರಿಸುವವರು
ಬಾಹ್ಯ ಸೌಂದರ್ಯ ಬರಿ ಕಣ್ಣಿನಾಳಕ್ಕೆ
ಎಂದಾಗ ನಾ ನಗದಿರುವುದಾದರೂ ಹೇಗೆ?

ಬಾಹ್ಯ ಸೌಂದರ್ಯ ಕ್ಷಣಿಕ
ಆಂತರಿಕ ಸೌಂದರ್ಯ ಚಿರ
ಅಂದಿದ್ದರು ಅವರೆಲ್ಲರು
ಹಲವಾರು ಬಾರಿ
ಆದರೆ ಕೊನೆಗೆ ವರಿಸಿದ್ದು ಮಾತ್ರ
ಅಂದದ ಹುಡುಗಿಯರನ್ನ!
ಅವರೆಲ್ಲರೂ ವರಿಸಿದ್ದು
ಸುಂದರ ಕನ್ಯೆಯರನ್ನೇ!
ಛೇ! ಅವರು ಹೇಳಿದ್ದು ನಿಜ
ಅವರೆಲ್ಲಾ ಮನಸೋತದ್ದು
ಆಂತರಿಕ ಸೌಂದರ್ಯಕ್ಕೆ!
ಅಂದದ-ಚೆಂದದ
ಚೆಂದುಳ್ಳಿ ಚೆಲುವೆಯರ
ಆಂತರಿಕ ಸೌಂದರ್ಯಕ್ಕೆ!
ಅಂದವಲ್ಲದ ಹುಡುಗಿಯ
ಆಂತರಿಕ ಸೌಂದರ್ಯ
ಅವರಲ್ಲಾರಿಗೂ ಕಾಣದಿದ್ದದ್ದು
ಮಾತ್ರ ವಿಪರ್ಯಾಸ!
ನಾ ಇನ್ನೊಮ್ಮೆ ನಕ್ಕು ಸುಮ್ಮನಾಗಲ?